2026 жылғы 6 мамырда ERASMUS+ DIANA — «Қазақстан мен Өзбекстанда ауылдық туризм саласындағы кәсіпкерлікті дамыту және енгізу арқылы әйелдердің мүмкіндіктерін кеңейту» халықаралық жобасы аясында Қазақ спорт және туризм академиясының базасында студенттермен ақпараттық кездесу өткізілді.
Кездесу барысында білім алушыларға ауылдық туризм саласындағы кәсіпкерлікті дамытуға және Қазақстан мен Өзбекстандағы әйелдердің экономикалық мүмкіндіктерін кеңейтуге бағытталған жобаның мақсаттары мен міндеттері таныстырылды.
Студенттерге ауылдық туризмді дамыту перспективалары, тұрақты туризм саласындағы халықаралық тәжірибе, сондай-ақ жобаның білім беру және зерттеу бастамаларына қатысу мүмкіндіктері туралы ақпарат берілді. Сонымен қатар, жастар кәсіпкерлігі, туризмдегі инновациялық тәсілдер және кәсіби құзыреттерді дамыту мәселелеріне ерекше назар аударылды.
Кездесу туризм саласындағы өзекті үрдістерді талқылауға, пікір алмасуға және студенттердің халықаралық білім беру жобалары мен академиялық ынтымақтастыққа деген қызығушылығын арттыруға арналған алаңға айналды.
