2026 жылдың 20 сәуірінде Қазақ спорт және туризм академиясында «Қазақстандағы мүмкіндігі шектеулі адамдарға қызмет көрсету бойынша практикалық құзыреттерді қалыптастыруға арналған халықаралық жобаның ашылуы өтті. Бұл жоба RITA (Region in Transition) – «Өңірдегі өзгерістер» бағдарламасы аясында жүзеге асырылуда. Жоба Польша-Америка Еркіндік Қорының қаражаты есебінен, «Білім беру демократия үшін» қоры жүзеге асыратын RITA бағдарламасы – «Өңірдегі өзгерістер» аясында бірлесіп қаржыландырылған.
Жоба қазақстандық жоғары оқу орындарының оқытушылары мен жас әлеуметтік қызметкерлерінің мүмкіндігі шектеулі адамдарға қызмет көрсету бойынша нақты практикалық дағдыларды меңгеруі негізінде поляк тәжірибесіне бағытталған оқыту әдістерін игеруіне бағытталған.
Осы күні қатысушылар «Ерекше қажеттіліктері бар адамдар» тақырыбындағы дәрісті тыңдап, одан кейін мүгедектер арбасымен жұмыс істеу бойынша, оның ішінде қауіпсіздік және алып жүру мәселелерін қамтитын тәжірибелік сабақтардан өтті. Дәріс пен тәжірибелік сабақтарды Польша елінен келген маман — Михал Сломински (Michał Słomiński) өткізді. Ол Белсенді реабилитация қорының FAR (Fundacja Aktywnej Rehabilitacji) қызметкері болып табылады және қозғалыс мүмкіндігі шектеулі адамдармен жұмыс істеуде үлкен тәжірибеге ие. Сондай-ақ тәжірибелік сабақтарды ұйымдастыруға және аударма жұмыстарына Польша жобасының келесі қызметкерлері көмектесті: Александр Скалий (Alexander Skaliy), Каролина Парадовска (Karolina Paradowska), Татьяна Скалий (Tatiana Skaliy), Валерия Хубина (Valeria Hubina).
Осы күні «Қазақстанда мүмкіндігі шектеулі адамдарға қызмет көрсету бойынша тәжірибелік құзыреттерді қалыптастыру» атты халықаралық жобаны іске асыру аясындағы барлық іс-шаралар Алматы қаласы мен басқа да өңірлерден келген қатысушылардың үлкен қызығушылығын тудырды.
