2026 жылғы 23 маусымда Қазақ спорт және туризм академиясына Грекияның Комотини қаласындағы Демокрит атындағы Фракия университетінің профессоры Николаос Аггелусис (Nikolaos Aggelousis) арнайы сапармен келді. Аталған сапар екі жоғары оқу орны арасында жүзеге асырылып жатқан Erasmus+ бағдарламасының кредиттік академиялық ұтқырлық жөніндегі халықаралық жобасы аясында өтті.
Сапар барысында профессор Демокрит атындағы Фракия университетінің қызметі туралы таныстырылым жасап, сондай-ақ «Sport-related Biomechanical Determinants of Force» және «Mechanisms of Musculoskeletal Injury» тақырыптарында дәрістер оқыды. Дәрістердің жалпы ұзақтығы төрт сағатты құрады. Іс-шараларға Қазақ спорт және туризм академиясының профессорлық-оқытушылар құрамы, ғалымдары мен қызметкерлері қатысты.
Дәріс аяқталғаннан кейін профессор Николаос Аггелусиске қазақтың ұлттық нақышында қолмен салынған кескіндеме туындысы естелік сыйлық ретінде табысталды.
Барлық іс-шаралар оқытушылардың халықаралық академиялық ұтқырлығы бағдарламасының мақсаттарына сәйкес ұйымдастырылды. Қол жеткізілген нәтижелер ынтымақтастықтың күтілетін қорытындыларына және Erasmus+ бағдарламасы аясындағы екі университеттің интернационалдандыру жөніндегі стратегиялық бағыттарына толық сәйкес келді.
Серіктестік қатынастарды одан әрі дамыту мақсатында профессор Николаос Аггелусиске Қазақ спорт және туризм академиясы мен Демокрит атындағы Фракия университеті арасындағы ынтымақтастық туралы меморандумның жобасы танысу және грек университетінің басшылығына ұсыну үшін табысталды.
