2026 жылғы 24-25 сәуір күндері Тұран университеті базасында Жоғары «Халықаралық қатынастар және дипломатия» мектебінің ұйымдастыруымен «TURAN MUN 2026» XV мерейтойлық халықаралық конференциясы өтті. Іс-шара жаһандық саясаттың өзекті мәселелерін талқылауға арналды және БҰҰ комитеттерінің отырыстарына барынша жақын форматта ұйымдастырылды.
Қазақ спорт және туризм академиясы атынан конференцияға ФОС факультетінің 1 курс студенттері Мәлік Нұржас, Жалғасбек Бекзат, Дүйсебаев Темірлан, Думанқызы Гаухар қатысты. Жетекшісі – педагогика ғылымдарының кандидаты, қауымдастырылған профессор С.М. Минбаева.
Конференция дипломатиялық, көшбасшылық және шешендік қабілеттерді дамытуға, сондай-ақ ымыраға келу, дипломатиялық этика нормаларын сақтау дағдыларын жетілдіруге арналған маңызды алаң болды. Сонымен қатар қазіргі заманның өзекті сын-қатерлерін талқылауға ерекше назар аударылды.
Конференцияның ашылу салтанатына халықаралық ұйымдардың, елшіліктердің және бұқаралық ақпарат құралдарының өкілдері қатысты. Бұл шараның маңызын айқындап, студенттердің кәсіби дипломатиялық ортаға енуіне зор мүмкіндік берді.
Тұран университеті ұйымдастырушылары мен конференция модераторларына іс-шараны жоғары деңгейде өткізгені үшін алғысымызды білдіреміз. Қатысушылар үшін бұл жарқын әрі есте қаларлық тәжірибе болды!
