2026 жылғы 9–10 сәуір аралығында Қазақстанда Ғылым күніне орай Қазақ спорт және туризм академиясының базасында «Дене шынықтыру, спорт, туризм, білім беру және ғылымды дамытудың басым ғылыми-педагогикалық бағыттары» атты IV Халықаралық форум, сондай-ақ форум аясында «Дене шынықтыру, спорт, туризм және білім беру практикасының өзекті мәселелері» атты IV Халықаралық ғылыми-практикалық конференция өтуде.
Форумның мақсаты – кәсіби диалогты қалыптастыруға ықпал ету, ғылыми мектептерді дамыту және дене шынықтыру, спорт, туризм мен білім беру жүйесіне озық тәжірибелерді енгізу. Форум аясында пленарлық және секциялық отырыстар, дөңгелек үстелдер, ұлттық спорт түрлері бойынша шеберлік сабақтары, жекпе-жек өнері фестивалі өткізіледі.
Жыл сайынғы халықаралық форум – дене шынықтыру, спорт, туризм, білім беру және сабақтас ғылым салаларындағы ғылыми әрі практикалық тәжірибе алмасуға арналған кәсіби алаң. Іс-шара Қазақстан, Түрікменстан, Тәжікстан, Ресей, Өзбекстан, Түркия, Бразилия, Колумбия елдерінің ғалымдарын, оқытушыларын, жаттықтырушыларын, білім беру және спорт ұйымдарының, орта білім беру мекемелерінің өкілдерін біріктіреді.
9 сәуір күні салтанатты шараны ҚазАСТ президенті, профессор Закирьянов Қайрат Қайруллинович ашып, өз баяндамасында жоғары оқу орындарындағы ғылыми зерттеулердің ерекше маңыздылығын атап өтті. Оның айтуынша, дәл осы оқу орындарында еліміздің болашақ экономикасын дамытатын жас мамандар тәрбиеленеді.
