Дәстүрлерді сақтау, өзара құрмет, ынтымақтастық және бейбітшілік қағидаттарына негізделген форум мәдени сабақтастықты қамтамасыз етуге, сондай-ақ дәстүрлі спорт түрлерінің халықаралық аренадағы позицияларын нығайтуға бағытталған.
Іс-шараға 100-ден астам жоғары лауазымды өкіл қатысты, оның ішінде 15-тен астам спорт және мәдениет министрлері, сондай-ақ халықаралық делегациялар, бейінді федерациялар өкілдері, ғылыми қауымдастық және дәстүрлі спорт түрлері саласындағы практик мамандар болды.
Форум күн тәртібінің негізгі бағыты «Этноспорт-2027» халықаралық жобасын іске асыру мәселелерін талқылау болды. Бұл жоба дәстүрлі спорт түрлері өкілдерін әлемнің түрлі өңірлерінен біріктіруге бағытталған және бірыңғай жарыс платформасы аясында жүзеге асырылатын ауқымды жаһандық спорттық бастама болып табылады.Форумның ашылуы пленарлық отырыспен басталып, оның аясында мультиспорттық ұйымдардың жаһандық ықпалы мәселелеріне арналған негізгі баяндама ұсынылды. Одан кейін «Дәстүрлі спорт түрлері әлемдік аренада» тақырыбында министрлердің қатысуымен жоғары деңгейдегі панель өтті. Панель модераторы Дүниежүзілік этноспорт конфедерациясының президенті Н. Б. Ердоған болды.
Қазақстан Республикасы делегациясының құрамында форум жұмысына Қазақ спорт және туризм академиясының Ұлттық спорт түрлері кафедрасы меңгерушісінің орынбасары, педагогика ғылымдарының магистрі Копжанов Ғалымжан Балықбайұлы қатысты. Ол сондай-ақ Қожа Ахмет Ясауи атындағы Халықаралық қазақ-түрік университеті, Қырғыз-Түрік «Манас» университеті, Хаджи Байрам Вели университеті (Анкара қ.), сондай-ақ Дүниежүзілік этноспорт конфедерациясының қатысуымен жүзеге асырылып жатқан «Орталық Азия өңірінің дәстүрлі спорт түрлері мен ойындарының энциклопедиясы» халықаралық жобасының редакторы болып табылады.
https://worldethnosport.org/8th-ethnosport-forum
