2026 жылғы 23 сәуірден бастап ҚазСТА-да RITA (Region in Transition) – «Өңірдегі өзгерістер» бағдарламасы аясында жүзеге асырылып жатқан «Мүмкіндігі шектеулі адамдарға қызмет көрсету бойынша практикалық құзыреттерді қалыптастыру» халықаралық жобасының төртінші күні басталды. Жоба Польша-Америка Бостандық Қорының қаржылық қолдауымен, «Білім беру демократия үшін» қорының жүзеге асыруымен өтуде.
Күннің бірінші жартысында поляк мамандары Еуропалық реанимация кеңесінің ұсынымдарына негізделген алғашқы дәрігерге дейінгі көмек көрсету бойынша дәріс өткізді. WSG Bydgoszcz University оқытушылары Александр және Татьяна Скалий жүрек немесе тыныс тоқтаған жағдайларда шұғыл көмек көрсетудің теориясын түсіндіріп, манекендер мен ҚазСТА білім алушылары арасынан еріктілердің қатысуымен практикалық тәсілдерін көрсетті. Сондай-ақ BLS, AED қолдану және зардап шегушіні қауіпсіз қалыпқа келтіру бойынша практикалық сабақ өткізілді. Дәріс соңында нұсқаушылар қатысушылардың сұрақтарына жауап берді.
Сонымен қатар «Best Practices in Sport Management» атты семинар өтті, оны жоба орындаушысы Филипп Вишневски жүргізді. Ол Польшадағы спорт ұйымын басқару мысалында Еуропалық Одақтағы спорт менеджментін жүзеге асыру тәжірибесімен бөлісті. Іс-шара ҚазСТА оқытушылары мен студенттерінің қызығушылығын тудырды.
Жоба нұсқаушылары Каролина Парадовска мен Валерия Хубина ҚазСТА-ның бейіндік мамандықта оқитын студенттері үшін фитнес-сабақ өткізді.
Түстен кейін жаңа күрес павильонында жоба командасы барлық ниет білдірушілерге, соның ішінде ҚазСТА оқытушылары мен студенттеріне, норвегиялық Laerdal Medical AS компаниясының манекендері мен польша өндірісіндегі дефибрилляторларды пайдалана отырып, алғашқы дәрігерге дейінгі көмек көрсету дағдыларын көрсетті. Бұл құрылғыларды медициналық білімі жоқ адамдар да қоғамдық орындарда жүрек талмасы кезінде көмек көрсету үшін қолдана алады. Сабақтар үлкен қызығушылық тудырып, барлық қатысушылар Қазақстан азаматтарының өмірі мен денсаулығына қауіп төндіретін төтенше жағдайларда пайдалы болатын білім алды.
