2025 жылдың 26 қарашасында Қазақ спорт және туризм академиясы, «Ұлттық спорт түрлері және күрес» кафедрасының аға оқытушысы Ғалымжан Балықбайұлы Копжановтың және №119 мектеп-лицейінінің ұжымының бірлесе ұйымдастыруымен,кәсіби спорт және жекпе-жек факультетінің деканы Бақытбек Мұхаметханұлы Қонақбаевтың қатысуымен «Көшпелі халықтардың ұлттық ойындарын дамыту мен насихаттаудағы заманауи әдістемелер мен тәжірибелерді зерттеу» жобасы бойынша семинар өтті.
Семинардың негізгі мақсаты – ұлттық спорт және ұлттық интеллектуалдық ойындарды мектептегі оқу-өндірістік үдеріске енгізудің тиімді жолдарын анықтау, жаңа педагогикалық технологияларды қолдану тәжірибесін талдау, сондай-ақ мұғалімдердің біліктілігін арттыру.
Семинарға Алматы қаласының және Алматы облысының сегіз ауданынан келген дене шынықтыру пәні мұғалімдері, әдіскерлер, ғылыми-практикалық орталықтардың мамандары қатысты.
Бұл жоба ҚР Оқу-ағарту және ғылым министрлігінің 2024 жылғы 5 қаңтардағы №4 бұйрығына («Жоғары және (немесе) жоғары оқу орнынан кейінгі білім беруді жүзеге асыратын ұйымдардың білім беру қызметіне қойылатын біліктілік талаптарын және оларға сәйкестігін растайтын құжаттар тізбесін бекіту туралы») сәйкес, 15.4-тармақтың талаптары негізінде жүзеге асырылады. Аталған бұйрыққа сәйкес, «Педагогикалық ғылымдар» бағыты бойынша кадрлар даярлау білім беру бағдарламаларының бейіндік пәндерін жүргізетін оқытушылардың кемінде 10%-ы мектепке дейінгі және орта білім беру ұйымдары базасында ғылыми зерттеу жұмыстарын жүргізуі тиіс.
